من "مش قادر أديك" إلى "أنا كمان غلبان".. هكذا عبر السيسي عن فقر مصر

تتواصل تصريحات عبدالفتاح السيسي المثيرة للسخرية، أو التي يعبر فيها عن عجزه عن حل مشكلات الوطن، ويؤكد فيها أن الوطن فقير، حيث كان آخر هذه التصريحات، في خطابه الأخير بمحافظة قنا، خلال افتتاح مجموعة من المشروعات، والتي أثارت تعليقات النشطاء.

من "مش قادر اديك" إلى "أنا كمان غلبان"، ومن "احنا مش في طابونة" إلى "لو ينفع اتباع هتباع" تنوعت تصريحات السيسي، وكان أغلبها للتعبير عن قلة الحيلة وطلب المساعدة، كما أكد نشطاء على مواقع التواصل الإجتماعي.

وفيما يالي أبرز تصريحات السيسي التي أثارت موجة من الجدل، والسخرية..

"أنا كمان غلبان"

أثناء كلمة وزير النقل والمواصلات هشام عرفات، علق  السيسى قائلاً: "المواطن لازم يعرف إننا بنكلف المرافق العامة والمواصلات، والمواطن اللى بيشتكي من زيادة أسعار تذاكر المواصلات وبيقول أنا مش قادر.. أنا كمان غلبان مش قادر". 

وتابع: "إحنا كمان مش قادرين، المواصلات بتكلفنا كتير".

"عايز قلب المواطن معايا"

وقال السيسى أثناء تواجده في قنا: "أنا أريد المواطن وهو فى بيته أن يعرف الحكاية كيف تسير لكي يكون قلبه معي، مثلما قلبي عليه".

وأكد أن الدولة في سباق لتوفير السلع الغذائية بسعر مناسب للمواطنين، وتشمل "قمح وسلع أساسية مثل زيت وسكر وأشياء أخرى".. مضيفًا "أن هناك زيادة في الطلب لارتفاع استهلاك الفرد وليس فقط لزيادة عدد السكان".

"إحنا مش فى طابونة"

وعلى هامش افتتاح مشروعات قومية بمحافظة قنا، قال السيسي: "هي مش طابونة، كل واحد يحط إيده على الأرض وميخرجش منها، أنا بصراحة زعلان أوى، كل واحد ياخد أراضي مصر وكل واحد يمد إيده على 20 فدان ياخدها، والله العظيم ولا فدان واحد".

"صبح على مصر بجنيه"

وقال السيسي فى إحدى مؤتمراته :"لو 10 ملايين مصري اللي معاهم موبايلات صبحوا على مصر بجنيه يعني فى اليوم 10 ملايين.. هندعم مصر".

"الشعب يجوع عشان نبني البلد"

وفي خطاب له مطلع شهر أكتوبر من العام الماضي، قال السيسي: "لازم احنا انشاالله ما ناكلش، انشاالله ما ناكلش، ونبني بلدنا"، هذا ما دعا إليه السيسي "أبناءه" المصريين لإنقاذ مصر بعدما نصحهم بضرورة وقف الاعتماد على الإمارات والخليج. 

"انتو مين؟"

ولم يتوقف خطاب السيسي في ذلك اليوم على ما سبق، فأقسم قائلاً: "أقسم بالله العظيم اللي هيقرب من مصر هشيله من على وش الأرض". 

وأضاف موجهاً حديثه للشعب المصري: "اسمعوا كلامي أنا بس متسمعوش حد تاني، أنا لما هقابل ربنا يوم القيامة هقوله أنا خليت بالي منهم". وتابع: "انتو مين.. انتوا مين.. انتوا مين..  مفيش حد هيقدر يقرب من مصر". وتداول المغردون  تصريحات السيسي بتعليقات ساخرة، كان من بينها: إييييه قالها أخيراً: "انتو مين"، المرحلة القذافية.

"لو ينفع اتباع هاتباع"

وبكى عبدالفتاح السيسي خلال كلمته وهو يتحدث عن حجم التحديات التي تواجه الدولة وصعوبة توفير التكاليف اللازمة التى تحتاجها، ليعبر عنها بتأثر قائلًا: "أنا لو ينفع اتباع هاتباع".

"بنستلف عشان نكمل مصروفنا"

وفي جلسة "اسأل الرئيس" على هامش فعاليات مؤتمر الشباب الثالث بالإسماعيلية، في معرض حديثه عن الأزمة الاقتصادية قال: "بنحاول نوقف الصرف والتطور الاقتصادي السلبي اللى إحنا ماشيين فيه".

وتابع السيسى: "معدل زيادة الموارد لا يتناسب مع معدل الصرف، وإحنا بنستلف عشان نكمل مصروفنا، وهي دى حكايتنا، وبنحاول نشتغل، ولكن أعدائنا مش عايزينا نطلع من إللى إحنا فيه".

"أنا مش قادر أديك"

في حوار مع الإعلاميين لميس الحديدي وابراهيم عيسى في برنامج "الطريق إلى الاتحادية" في مايو 2014 قبل الانتخابات الرئاسية، ورداً على سؤال عن الاحتجاجات الفئوية قال السيسي: "أنت مش محتاج تقولي هات.. أنا لو أقدر أديك هديك من عيني... بس أنا مش قادر... هتاكلوا مصر يعني... هتموتوها يعني". 

"غيرتم حاجة كبيرة كانت بتترتب"

وقال خلال مؤتمر الشباب بالإسماعيلية في حديثه عن الإرهاب بسيناء: "المعركة إللي أنتم يا مصريين بتخوضوها، معركة كبيرة، وسبحان الله العظيم، أنتم غيرتم حاجة كبيرة كانت بتترتب".

"ما يصحش كده"

في كلمته في الندوة التثقيفية التي نظمتها القوات المسلحة، مطلع نوفمبر 2015، هاجم السيسي وسائل الإعلام في 2015 على خلفية تغطيتها لفيضانات الإسكندرية، وقال: "أحد الإعلاميين بيقول الرئيس قاعد مع شركة سيمنز وسايب إسكندرية بتغرق، عيب مايصحش كدا، بحس الناس دي ولا عارفة أي حاجة... المرة الجاية هاشتكيكم للشعب... مايصحش كدة إحنا بنتجاوز كل حاجة، الأمر دا لا يليق، مايصحش كدة، انتو بتعذبوني إن أنا جيت وقفت هنا، بحس إن الناس لا هي عارفة ولا فاهمة أي حاجة في الدنيا، بس قدامي ميكروفون بتكلم فيه أو جرنال بكتب فيه، لا يا جماعة دي دولة هتضيع مننا كدة.

"لدينا انجازات كثيرة.. لكننا نخفيها عن الأشرار"

وخلال كلمته في فعاليات الندوة الثقافية الـ17 التي نظمتها القوات المسلحة للاحتفال بالذكرى 33 لتحرير سيناء، قال عبد الفتاح السيسي: "مش عاوز أتكلم عن الإنجازات كتير عشان الأشرار صدقوني فيه كلام كتير ممكن أقوله، بس أنا عارف أهل الشر بيسمعوا الكلام وييجوا على الحاجة الطيبة وعاوزين يحرقوا قلبنا وقلبكم عليها"

"الكلام عندي بيمر بفلاتر"

وبرر السيسي، حين كان مرشحاً لرئاسة الجمهورية، أنه يتأخر في الكلام ويتعذب من أجل أن يتكلم لأن كلامه يمر على "فلاتر"، وقال خلال لقائه وفدًا من الأدباء والمثقفين: "بتأخر في الكلام لأن أنا الكلام عندي بيعدي على فلاتر-.. فلتر الصدق... فلتر الأمانة... فلتر الحق... وده يرضي ربنا أقوله ولا لأ... تصور حضرتك كل كلامي كده... بتعذب أوي عشان بتكلم".