روى، أحد شهود العيان على الانتهاكات والجرائم التي ترتكبها ميليشيات أمن الانقلاب داخل سجون العسكر، لـ"رصد"، واقعة حدثت أمامه يوم السبت 15 نوفمبر الجاري، خلال زيارته لـ"أحمد صلاح" أحد المعتقلين داخل سجن المرج.
وقال شاهد العيان:"إنه رأى بعينيه أحد المعتقلين ملقى على الأرض، يعاني آلامًا حادة في الغضروف، الأمر الذي لم يروق لأحد الضباط وقام على إثره بالتعدي عليه بالضرب وألوان التعذيب المختلفة".
وأضاف: الشاب المريض الملقى على الأرض لما شافه الضابط قاله قوم وشتمه والشاب مش قادر يقوم، فالضابط شتمه بأمه، فالشاب رد عليه وقاله ماتشتمنيش بأمى أنا سياسي، فالضابط اتنرفز وقاله أنا هعرفكوا السياسيين بيتعملوا ازاي".
واستكمل الشاهد حديثه:" وبعدها مسكه الضابط هو وخمس مخبرين وضابط تاني، أسمائهم هي عاصم عبد الحليم الضابط اللى حصلت معاه الواقعه، وأحمد صفوت الضابط اللى أشترك معاه، وأسماء الخمس مخبرين هي محمد عبد المقصود، وأحمد عبد الخالق، ومحمد سمير، ومحمد صبحي، وعاطف شحاته".
ومضي يقول: كل الضباط اجتمعوا على الشاب المريض وضربوه، ونقلوه الاستقبال من جديد حتى يتعامل كأنه سجين من جديد ويمسح العنابر.
وتابع: عرفت بعد كدة من الناس اللي راحت زيارات يوم الأحد والاتينين، إن الضابط عاصم تاني يوم ظهر فى الزيارة أيده مربوطة برباط ضغط تعبته من كتر ما ضرب الشاب، وبعد زيارة يوم السبت وهما راجعيين من الزيارة أجبرهم على خلع ملابسهم وحرقها قدامهم ودخلوا العنابر بالملابس الداخلية.
وأردف قائلًا: نظام الحياة داخل المؤسسة باختصار كما يرويها لنا المعتقلين، هو صحيان ونوم في مواعيد، وطول اليوم قاعد قعدة معينة مينفعش تكلم حد مينفعش تبص لحد جنبك، متتضحكش متبتسمش، دخول الحمام أوقاته محددة وساعات فترة وجودك فالحمام بتبقى محددة، في تنضيف مسح وكنس تلات مرات يوميا مع الفجر وبعد الظهر وبليل.
وأضاف: العنبر له كذه افندي، الافندي موظف في المؤسسة، كل افندي بيبقى موجود في العنبر في فترة العمل صباحية أو مسائية او ليلية، وفي رئيس العنبر و ده بيبقى مسجون ، هو اللي ماسك الدنيا جوه في القيادة وفي الآخر مشرف السهارية.
وقال: المجرمين دول بيبقو متحكمين في المعتقلين، والغلطة جوة بحساب، والحساب ده ممكن يجي على شكل بوكسين في البطن، ضرب بالركبة في البطن أو غيره أو ممكن يبقى ضرب بالملة اللي هيه عصاية خشب مثلا على الإيد او أطراف الأصابع أو ممكن ضرب بقبضة اليد على الحنجرة، الضربة دي تسمى بلاعة او نفس الضربة بس على القفا و تسمى كهربا، كل ده ضرب بسيط و عادي و يحصلك اذا غلطت.
وواصل: والغلط ده بيبقى مثلا ضحكة أو ابتسامة أو كلمة قلتها لحد جنبك بصيت جنبك أو وراك عملت حركة منغير ما تستاذن، والحساب يختلف لما الغلطة تبقى اكبر و طرق الضرب اللي تعتبر بسيطة اللي انا كتبتها بيحصل اضعافها وبطرق مختلفة، منها سحل على الأرض وضرب بالأحذية وتعريه وتصنيف لعنبر التأديب، والعنبر ده عبارة عن عنبر عادى وفيه جنائيين لكن الضرب فيه كل ساعه وإهانه طول الوقت".
