تلوث المياه وزيادة نسبة الأملاح هي أكثر المشاكل التي يعاني منها أهالي قرية الصبيحي بمركز يوسف الصديق بالفيوم، الأمر الذي يزيد نسبة الأمراض المزمنة لدي الأطفال.
يقول محمد حلمي، أحد الأهالي، “مية الشرب عندنا لا تصلح حتى للحيوانات نسبة الملوحة فيها عالية جدا، وأنا عن نفسي بخاف استخدمها في بيتي، وعشان كده اضطريت اجيب فلتر للمياه“.
كما تقول الحاجة أم علي”جنبي بيوجعني كتير من مية الشرب وكل ما اكشف عند الدكتور واعمل تحاليل يقولوا لي الأملاح زيادة عندك، اعمل ايه دلوقتي؟ اصرف على الدوا ولا على المية المعدنية؟”.
ويقول هشام محمود “المية في أغلب مناطق وقرى محافظة الفيوم زي الزفت وزهقنا من حياتنا ﻻ مية نضيفة ولا مية ري ولا خدمات، مفيش غير غلاء الأسعار وارتفاع فواتير المية والكهربا“.
ويقول فرحات راضي “أنا آخر ما زهقت حلفت ما هدفع فواتير المية، إلا بعد ما يحلوا لنا المشكلة دي نشرب مية نضيفة“.
كما تقول أم محمود “مية الحنفيات عندنا قليلة جدا وبتقطع كتير، آخر ما زهقنا اضطرينا نحفر في الأرض عشان المية تيجي عندنا، يعني لو حضرتك شوفت حفرنا أكتر من مترين عشان نحط موتور عشان المية تيجي”.
