بعد مرور أسبوع على تطبيق منظومة الخبز الجديدة في محافظة الفيوم، مازالت المشاكل مستمرة وسط تجاهل من المحافظة ووزارة التموين، على الرغم من شكاوى المواطنين.

ويتكدس يوميا عشرات المواطنين أمام مكاتب التموين في محاولة منهم لاستخراج البطاقات، وآخرون لم تعمل بطاقتهم على الماكينات الذكية ولم يستطع المئات صرف الدقيق أو الخبز بسبب عدم عمل كروتهم .

وقال شريف محمد “أنا خفت معرفش آخد الدقيق بتاعي، ومش هقدر اروح اشترى عيش مش مدعم كل يوم، رحت عشان اسجل اسمى قالولي اسمك متسجل فى العيش، وكمان انت صرفت العيش بتاعك، يعنى أنا سجلت امتى وصرفت امتى؟ ده نصب عينى عينك، اوكل ولادى منين واجيب فلوس منين لكل يوم عيش حرام عليكم “.

بينما قال مصطفى أحمد “دى كروت غبية مش كروت ذكية، أنا طلعت الكارت ومش راضي يشتغل على المكنة وبتاع التموين يقولي روح الوزارة في الفيوم، مادام هي منظومة خربانة بتشغلوها ليه عاوزين تبهدلوا الناس ؟”.

وقال رجب حسن “أنا بقالى 4 أيام بحاول اسجل ولادي ومش عارف، كل ما اروح عند مكاتب التسجيل تلاقى الدنيا زحمة، يعنى أنا كل يوم بضطر اشترى بـ 5 و بـ 7 جنيه عيش زيادة عشان العيال، وأنا مدرس يعني بقبض كام انا فى الشهر عشان اتحمل التكاليف دي كلها، فين السيسى ييجي يشوفنا واحنا واقفين فوق بعض في الطوابير “.