ارتفعت أسعار الكحك هذا العام لتتجاوز 30% عن العام الماضي، مما دفع المواطنين إلى شراء الكحك بكميات محدودة، بل أدى بمحدودي الدخل إلى عدم شرائه هذا العام.
تجاوز سعر كيلو الكعك الـ50 جنيهًا، ووصل البسكويت إلى 48 جنيهًا للكيلو، و”البيتي فور” وصل سعره ليقارب الـ70 جنيهًا، كما وصل سعر كيلو الغريبة إلى 60 جنيهًا، فضلًا عن الارتفاع الملحوظ في أسعار الشيكولاتة؛ فبعد أن كانت الشيكولاتة العادية سعر الكيلو من 15 إلى 18، أصبح سعر الكيلو 28 جنيهًا.
يقول محمد سانوسي، صاحب مخبز: “الأسعار زايدة السنة دي زيادة عن اللزوم والناس جاية تشتري الكحك عاوزين يشتروه بأقل من تمنه أصلًا.. حالنا واقف والموسم مبقاش موسم منهم لله اللي كانوا السبب”.
وأضاف عماد رأفت “موظف”، يعني حتى الكحك وشيكولاتات العيد بقوا عبء.. المرتب هيقضي إيه ولا إيه، يعني عشان انزل اشترى كحك وشيكولاتة محتاج 200 جنيه دا لو هجيب على القد، طب والملابس بتاعة الأطفال هتدخل في 500 جنيه، وأضاف المرتب فيه كام 700جنيه.
وتقول أسماء رمضان “مدرسة”: “الأسعار السنة دي مبالغ فيها أغلى كتير من السنة اللي فاتت”، وأضافت “أنا قلت مش هشتري كحك وهعمله أنا في البيت لقيته هيكلفني أكتر من سعر الكيلو الجاهز الدقيق والسمنه أسعارها ارتفعت أوي حتى البيض سعر البيضة وصل لجنيه ولجنيه وربع”.
ويعلق أحمد سعيد “مهندس ري” على ارتفاع الأسعار: أنا قللت كمية الكحك والشيكولاتة السنة دي، هعمل إيه يعني أهو نص العمى ولا العمى كله”.
وقال حسن إبراهيم “عامل في محل حلويات”: “الوضع سيئ جدًا والإقبال ضعيف، دا حتى البيع والشراء أقل من الأيام العادية على الرغم من إن احنا في موسم”، وأضاف “بس الناس هتعمل إيه الأسعار فعلًا غالية على الكل غني وفقير”.
مدام عفاف عبرت عن وجهة نظر أخرى بقولها: “هو كل حاجة الحكومة وكل شوية نطلع نقول الأسعار غالية ما اللي معهوش ميلزموش وبعدين الكحك والشيكولاتة والحاجات دي كماليات مش أصل يعني فاللي معاه يشتري واللي معهوش يسكت”.
واختلفت معها “صفاء كرم” ربة منزل قائلة: “هو الغلبان هيبقى محروم من كل حاجة حتى فرحة العيد، حسبي والله ونعم الوكيل في اللي وصلوا حال البلد لكده”.
