اشتكى أهالي محافظة دمياط مما اعتبروه جريمة ترتكبها شركات الكهرباء بحقهم مطلع كل شهر، حيث تتم سرقة أرصدة المواطنين من العدادات، وذلك بمجرد شحن العدادات، مما أدى إلى الاستياء الشديد من المواطنين.
وفوجئ مواطنو محافظة دمياط من النقص الملحوظ في أرصدة عدادات الكهرباء مسبقة الدفع، والتي لم يمر على شحنها سوى يومين، وأثناء التوجه للشركة لمعرفة المشكلة وسبب اختفاء الرصيد، كان الرد “الله يعوّض عليك”.
يقول شادي عطا، أحد أصحاب الورش، إنه قام بشحن العداد بمبلغ 300 جنيه مساء الأربعاء 29 يوليو، ويوم السبت ذهب إلى ورشته ليجد التيار الكهربائي مفصولا، وقام بتفقد العداد ليفاجأ بنقص الرصيد إلى 74 قرشاً بعد 48 ساعة فقط من العمل.
ويضيف شادي: “جريت على الشبكة لقيت طابور طويل للغاية من الأهالي، وكلهم عندهم نفس المشكلة، ولما سألت الموظف قال لي هو النهارده كام في الشهر، قلت له النهارده 1 أغسطس، قال لي ربنا يعوض عليك ومافهمتش حاجة”.
وكان لصادق سعيد، أحد عمال النجارة، تعليق آخر، حيث قال: “والله لو الحكومة ما جابت لنا حقنا وباطلت تسرق فلوسنا بالطريقة دي هنسرق إحنا كمان الكهرباء، لأن اللي بيحصل ده مايرضيش حد، يعني إزاي رصيدي يتسرق من العداد”، وأضاف غاضبا: “أبقى شاحن الكارت وبعد يوم واحد الكهرباء تفصل عني، وألاقي العداد مصفر مافيش فيه رصيد، أومال فلوسي راحت فين، وأخدوها إزاي من غير استهلاك، وماحدش في الشبكة بيعرفنا حاجة ويقول لك ماعندناش فكرة، أومال مين اللي عنده، يعني دولة تانية مثلا؟”.
وكانت هناك شكوى من أهالي عزبة البرج بالمحافظة، وهي أن موظف وحدة شحن العدادات لا يعطي إيصالا بالشحن، فقط يقوم بشحن الكارت دون إعطاء المواطن إيصالا يدل على العملية التي جرت، وكان رد المسؤولين من داخل شركة الكهرباء، هو عدم وجود ورق للطباعة فضلاً عن تعطل ماكينات الطباعة.
