واصل أهالي محافظة الفيوم إحجامهم عن الإدلاء بأصواتهم لليوم الثاني على التوالي في الانتخابات البرلمانية، وخاصة في مركز سنورس.
يقول محمود السعدني: تكاليف فلوس الانتخابات المزورة اللى بيضحكوا بيها علينا وف الآخر بيختاروا اللى هما عاوزينه، عدت الـ 2.5 مليار جنيه فبدل ما يضيعوا الفلوس دى كلها على انتخابات مزوره ، يصرفوها على الشعب الغلبان اللى مش لاقى يأكل.
وتتساءل سعاد الزيني: “هروح أنتخب مين؟ نواب البرلمان والناس المحترمة كلهم في السجون وسايبين لنا شويه الحراميه وتجار الآثار وبتوع الحزب الوطنى المنحل اللى شبعوا نهب فى فلوس البلد”.
ويؤكد ممدوح فتحي: “أنا مش هنزل انتخب حد، انا نزلت انتخبت 5 مرات فين اصواتى، راحت فين، يبقى منزلش احسن ، طالما هنزل وبمزاجهم هيحلوه وبمزاجهم هيعملوه ، وبمزاجهم هينجحوا اللى عاوزينه .. يبقا انزل ليه؟؟”.
وتعلق فوزية سعيد: “أنا رحت علشان انتخب واول ما وصلت اللجنه بصيت من بعيد على شكل الانتخابات لقيت رقص وطبل وحريم بترقص، وحاجه ما يعلم بيها الا ربنا رجعت بيتى وعرفت فعلاً ان اللى احنا فيه ده انقلاب ونكسه ودعيت ربنا يخلصنا من العالم اللى معندهاش ضمير”.
ويضيف السيد معوض” هانزل انتخب مين وليه؟ انا شايف الناس اللى كانت مترشحه فى 2010 هما نفس الناس اللى نازله انتخابات 2015 اللى هما اصلاً بتوع الحزب الوطنى المنحل ، انا نزلت انتخبت السيسى ودلوقتى السيسى ضحك علينا ، وعدنا بمشاريع ومفيش ولا مشروع منهم اتحقق يبقا انزل انتخب برلمان كمان وناس ولا عمرى شوفتهم ولا خدموا البلد قبل كده ، دول نازلين يلموا فلوس ويقعدوا على الكراسى وخلاص”.
