نشرت جريدة “الأهرام المسائي” نص مكالمة انفرد بها محمد شبانة رئيس رابطة النقاد الرياضيين، بين أحد أعضاء اتحاد الكرة ومسؤول بلجنة الحكام لمجاملة الزمالك في اختيار حكام المباريات.

وجاء نص المكالمة كالتالي:

مسؤول بالجبلاية: ها.. يا كابتن “أ”.. إزيك

مسؤول بلجنة الحكام: الحمد لله يا باشا.. كنا عايزين نتكلم مع حضرتك شوية

مسؤول بالجبلاية: أمرني مسؤول بالحكام، نقعد مع بعض شوية نشوف هنعمل إيه الفترة الجاية والأمور إن شاء الله والدنيا هتتظبط كده، والأمور هتبقى كويسة

مسؤول بالجبلاية: أنا مسافر للعمرة مسؤول بالحكام: هتيجي امتى إن شاء الله

مسؤول بالجبلاية: هاجي السبت.. هأكون معاك الأحد مسؤول بالحكام: تقبل الله

مسؤول بالجبلاية: هاجي السبت والأحد هأكون معاك.. ماتشغلش بالك أنا عارف إن فيه حروب بين المجلس نفسه.. وأنا مساند “ج” في قراره “ع” مصر ومتمسك بوجودك (..) اللي اسمه جمال الغندور طبعا عامل يعني تكتلات علشان ييجي.. أحمد من ناحية.. كذا عضو كده من ناحية.. كابتن حسن فريد النهارده كلمته ومحمود الشامي وحمادة المصري.. يعني معانا لوبي فيه 6 أعضاء.. بس عايزين المرحلة الجاية يا كابتن “أ” نعديها.. يعني إمبارح محمد فاروق كان عشرة على عشرة محدش يقدر يتكلم وكلمت رئيس الزمالك قلت له أظن مالكش كلام.

مسؤول بلجنة الحكام: ده طلع مع خالد الغندور قال تحكيم محترم وخالد الغندور قال له.. مش عارف إيه.. والحكاية والرواية والبلاغ اللي أنت مقدمه.. قاله الكابتن “.. .” مالوش دعوة بالرشوة.. كابتن “…” متفق مع المجلس إنه هيمشوه في يناير ولكن هو بالنسبة للرشوة هو مالوش دعوة بالرشوة.. الرشوة دي كانوا حكام ومتفقين عليّ عايزين يحطموا ويخسروا النادى ولكن كابتن “…” مالوش دعوة بالرشوة خالص وهو بعيد عن الموضوع ده.

مسؤول بالجبلاية: تمام.. لأ.. هو غلبان خلي بالك يا أستاذ “أ”.. أنا لما اتكلمت معاه.. أنا قعدت معاه قلت له عشان خاطري.. أجيبلك مين؟! عايز تجيب جمال الغندور يبيعك ولا عصام صيام.. يا عم خليك في اللي نعرفه يكفي إنك تبقى واحد نضيف.. وقلت له بعد إذنك ليك حاجة واحدة قبل الماتش إحنا مش هنجيب.. قالي أنا مش عايز حد يبقى علي.. قلت له جميل هنجيب لك حكام دوليين محترمين.

مسؤول لجنة الحكام: وأنا جايب له حكم هو بيحبه.. وهو مبسوط منه.

مسؤول بالجبلاية: اللي هو مين؟؟ ماتش إيه؟؟ مسؤول بالحكام: ماتش الزمالك والمقاصة.. جهاد جريشة مسؤول بالجبلاية: زي الفل

مسؤول بلجنة الحكام: تمام مسؤول الجبلاية: مالوش حجة.. زي الفل.. أحسن كده.. ماتقولش لحد خالص الكلام ده.

مسؤول بالحكام: لأ.. أنا باقول لك أنت بس. مسؤول بالجبلاية: إنت عارف ليه أنا باسكته بالكلام ده! علشان يبعد عننا.. ما هو خد بالك.. هو برضه سم.. أنا كده علشان أعرفه اللي بيعمله معاك كابتن “…” مش هيعمله معاك إلا أنت.

مسؤول بالحكام: خلي بالك يا كابتن “…” أن الإعلامي “ش” كان بيقولي أنت هتلاعب جهاد اللي راح لرئيس الزمالك الصوان والبتاع عشان يسانده.. قلت له يا كابتن “ش” أنا عندي جهاد محترم وكبير.

مسؤول بالجبلاية: سمعتك يا باشا.. قلت له.. سمعتك.. كلام محترم.. إن شاء الله.. بس متشغلش بالك.. وأنا خلي بالك لما بلاقي فيه خطر.. باعمل لوبي.. أنا عامل لوبي دلوقتي.

مسؤول بالحكام: أنا يهمني أنت يا كابتن.. يهمني أنت أهم حاجة

مسؤول بالجبلاية: يا باشا ماتشغلش بالك.. ولا حد يقدر ييجي ناحيتك.. يلا يا كابتن أشوفك فالاتحاد إن شاء الله.

مسؤول بالحكام: إن شاء الله تيجي بالسلامة.. بس خليه يهدى علينا يا كابتن.