كتبت الناشطة والمصورة إسراء الطويل أول منشور عبر صفحتها الرسمية على موقع “فيس بوك” في أول تعليق لها بعد قرار إخلاء سبيلها.

وقالت إسراء في المنشور: “أولا أنا بشكر كل المتضامنين معايا من منظمات حقوقية وأفراد في كل مكان بالدعاء أو بحرف أو كلمة أو مقال أو فعل، شكرا جدا فعلا وممتنة ليكم حقيقي. تم إخلاء سبيلي على ذمة القضية بتدابير احترازية (إقامة جبرية ومبقدرش أخرج من البيت غير بإذن الشرطة ويوم في الأسبوع بروح فيه القسم للمراقبة) يوم 19 ديسمبر 2015 بعد 15 يوما اختفاء قسريا و188 يوما حبسا احتياطيا. أول امبارح 20/1/2016 كانت جلسة التجديد في قضيتي وتم تخفيف التدابير الاحترازية للمرور على القسم يوما واحدا في الأسبوع لمدة 45 يوما حتى الجلسة الجاية.. بحاول أستعيد صحتي في الوقت الحالي وأعوض الـ7 شهور اللي اتمنعت فيهم عن علاجي”.

وأضافت: “ثانيا أنا مش بطلة ولا أي حاجة، أنا اتقبض عليَ وأنا خارجة من تشيليز نايل سيتي كنت بتعشى مع عمر وصهيب، واللي قبض علينا كلم حد في التليفون قالوا: “يا باشا فيه اتنين معاه كمان واحد اسمه عمر محمد علي وواحدة اسمها إسراء محفوظ أجيبهم معايا؟”وسألني أنتي أخت أسماء محفوظ؟! ومن وقت اصابتي في 25 يناير 2014 و أنا مليش أي علاقة فعلا بمظاهرات ولا أي حاجة بتحصل في مصر عشان أقدر اركز على علاجي لأنني كنت مشلولة تماما في أول اصابتي ولمدة 6 شهور لما بدأت أقدر اقف على رجلي ، فيه ناس في السجن بقالهم سنين ممكن يكونوا هم الأبطال فعلا “.
وتابعت:” و أنا مش ناشطة سياسية ، حد سمع عن أي آراء سياسية قبل كدا ليا ولا شافني في أي إعلام قبل ما يتقبض عليا ؟ . و أنا مش إخوان ولا عمري كنت إخوان قبل كدا و مليش أي علاقة لا بـ”نساء ضد الإنقلاب” ولا بـ”شباب ضد الإنقلاب” هي دي الحقيقة ! مش عشان ليا أصدقاء منهم يبقى أنا إخوان !. وأنا مش 6 أبريل ولا عمري انضميت ليهم بردو ومش عشان ليا أصدقاء منهم يبقى أنا 6 إبريل. أنا جيت مصر في آخر 2010 وحبيت التصوير وحاولت اتعلم تصوير صحفي فأتعرفت على ناس كتير وبقى ليا أصدقاء كتير لكنني دايما مستقلة برأيي وما بحبش أكون محسوبة على أي جهة ولا عمري انضميت لأي حزب .أنا إسراء وبس . و أنا مش إرهابية ، التهم اللي وجهتهالي نيابة أمن الدولة وحبستني عليها احتياطي هي (الانضمام لجماعة إرهابية ونشر أخبار كاذبة ) و أنا لا انضميت للجماعة ولا نشرت أخبار كاذبة ! مليش علاقة بالقصص اللي بتتقال في الإعلام !”.

واختتمت منشورها قائلة:”أتمنى قريب كل المظلومين في السجن يخرجوا ويكون فيه عدل ، السجن وحش جدا وبيقتل الحياة ، السجن مش حرية ولا حاجة من الشعارات اللي بتتقال دي كلها ، السجن ذل وقهر ورعب في الحقيقة أتمنى إن أي مظلوم ميباتش ليلة واحدة في السجن”.

(function(d, s, id) { var js, fjs = d.getElementsByTagName(s)[0]; if (d.getElementById(id)) return; js = d.createElement(s); js.id = id; js.src = “//connect.facebook.net/en_US/sdk.js#xfbml=1&version=v2.3”; fjs.parentNode.insertBefore(js, fjs);}(document, ‘script’, ‘facebook-jssdk’));