كل الجرائد العالمية امبارح كتبت عن التصريحات التصعيدية اللي عملها رئيس الوزراء الإيطالي بخصوص مقتل الطالب جوليو ريجيني واللي بيحذر فيها إن العلاقات مع مصر على المحك إلا إذا المسؤولين المصريين أفصحوا عن اللي عذب جوليو حتى الموت بطريقة وحشية. رئيس الوزراء طالب بضرورة التعاون بشكل كامل مع جهات التحقيق الإيطالية.

الإيطاليين للأسف عندهم قناعة إن اللي متورط في قتل جوليو هو جهاز أمني مصري، ووزير الداخلية الإيطالي صرح إن فيه شهود عيان أكدوا إن جوليو اتقبض عليه يوم 25 يناير في منطقة الدقي. وتغيير القناعة دي أصبح صعب إلا لو أجهزة الأمن في مصر قدرت تقدم دلائل مادية واضحة على مين اللي وراء مقتل جوليو.

الكارثة دي أكبر بكتير من كارثة الطيارة الروسية والسياح المكسيكيين لسببين:

الأول إن الحالة الأولانية كانت حادثة إرهابية نتيجة إهمال وتقصير أمني فادح، والتانية كانت قتل خطأ، لكن في حالة جوليو لو صح تورط جهاز أمني هتبقى أول حالة قتل متعمد لأجنبي بعد عملية تعذيب وصفتها السلطات الإيطالية بالوحشية.

والثاني هو إن جوليو كان طالب دكتوراه، وبالتالي من المتوقع إن الجامعات والمؤسسات الأكاديمية الدولية هتتحرك ضد مصر وده ممكن يؤدي لتصعيد يحطنا في أزمة مع المؤسسات دي نتائجها هتكون سيئة جدًا.

أتمنى إن نتيجة التحقيقات توصل لنفي تورط أجهزة أمنية في مقتله لأن الوضع مش ناقص، وربنا يستر على البلد اللي نظامها داير يوزع اتهامات على معارضيه بالخيانة والتآمر، وهو الساعي الأساسي في هدم مفهوم الدولة وإهدار القانون والعدل.