اعتبر الناشط السياسي والبرلماني السابق مصطفى النجار أن ما قاله نائب رئيس جهاز مباحث أمن الدولة السابق من وجود 12 ألف فاسد داخل الوزارة، هو سب وقذف للعاملين في جهاز الشرطة.

وقال عبر فيس بوك: “بغض النظر عن استخدامه كلمة نسوانهم الغريبة في السياق دا، الراجل بكل ثقة بيقول إن فيه ١٢ ألف سيدة تم تعيينها داخل وزارة الداخلية في وظائف مدنية عبر الفساد واستخدام النفوذ من سنة ٢٠١١، يعني بيتهم كل قيادات الوزارة على مدار ٥ سنين بالفساد بما فيهم الوزير الحالى اللي مفترض كدا انه ساكت عن الفساد دا“.

وأضاف “النجار”: اتهام أمناء الشرطة أنهم إخوان دا فعلا نكتة الموسم والأهم منه هو انقلاب موقف الإعلام فجأة ضد أمناء الشرطة، يعني نفس المذيع من أسبوعين في أزمة أطباء المطرية دافع عن الأمناء دفاعا مريرا وقال لك بيقدموا تضحيات عشان مصر، النهاردة مستضيف حد بيشتمهم بالالفاظ دى، ودا بيقول للناس اللى لسه بتطبل إن كلام الإعلام عبارة عن توجهات سياسية وأوامر بتيجي ويتم تعميمها على المذيعين دول”.

واختتم النجار: “على العموم خليك مكانك واتفرج وانت جواك يقين أن ما بنى على باطل فهو باطل وإن ربنا لا يصلح عمل المفسدين، يعني بالبلدى كدا هتيجي تسد الثقب الشمال هيتفتح لك ثقب تاني يمين لأن المسارات كلها منفدة على بعضها، ومن غير إصلاح شامل وباستمرار الترقيعات المركب هتغرق، ودا اللى بنقوله من سنين بس محدش بيسمع وفاكرينها هتمشى بالدراع ! ربنا يستر على البلد !!!“.

كشف اللواء عبدالحميد خيرت، نائب رئيس جهاز مباحث أمن الدولة السابق، أن “هناك 12 ألف فاسد في وزارة الداخلية”، كان قد تم فصلهم إبان أحداث 25 يناير، ثم صدر قرارًا بعودتهم مرة أخرى للوزارة”.

واضاف- خلال حواره في برنامج “على مسئوليتي”، مع أحمد موسى، على قناة “صدى البلد”: أن تلك العناصر كانت تمارس أعمال بلطجة على مستوى مديريات أمن الجمهورية، بمساندة الإخوان في عهد الدكتور محمد مرسي- حسب قوله.