سادت حالة من الغضب والخوف بين الفلاحين بمدينة الرحمانية التابعة لمحافظة البحيرة بسبب نقص منسوب المياه بترعة “ساحل مرقص”، والتي يعتمد عليها الفلاحون في ري الأراضي الزراعية.
وثقت كاميرا “رصد” نقص المياه في المدينة، وتعرفت على آراء بعض المواطنين في الحادث، فقال محمود حلمي: “إحنا خايفين من نقص المياه عشان مش هنعرف نروي أراضينا، وهيقف حالنا وده مايرضيش حد، ودي من بشاير سد النهضة اللي هيخرب بيوتنا والحكومة ساكتة”.
وأضاف محمد حمدي: “والله اللي بيحصل ده مايرضيش ربنا، المياه لما بتنقص في الترعة الأملاح بتزيد وده هيبوظ الأرض والزرع، وإحنا بنحمل محافظ البحيرة والحكومة المصيبة دي، ولازم يتصرفوا ويوصلوا لنا مياه، ولو مش قادرين يحلوا المشاكل يرحلوا عننا وييجي اللي بيعرف يحلها”.
وقال محسن الأحمر: “مافيش ميه ومافيش كيماوي ومافيش سماد، والجمعيات بيسرقوها ويبيعوها لنا غالي، والدولار سعره زاد، ومحاصيلنا في الأيام السودة دي مش هنعرف نبيعها وبيوتنا اتخربت”.
وطالب الفلاحون الحكومة ومحافظ البحيرة بالرقابة على الجمعيات الزراعية للحد من سرقة المبيدات وبيعها في السوق السوداء.
