حذر حازم حسني، أستاذ الاقتصاد والعلوم السياسية، من الفرحة الزائدة من قبل بعض المصريين بعد إعلان الحكومة المصرية عن اكتشاف شركة إيطالية لأكبر حقل غاز طبيعي في مياه البحر المتوسط، مؤكدًا ضرورة التأكد أولًا من مصداقية الاكتشاف قبل الفرح به.
وتحت عنوان “ماتوزعوش المغات قبل ما تسمعوا صوت المولود”، قال أستاذ العلوم السياسية -عبر منشور له على “فيس بوك”-: “بمناسبة اكتشاف شركة إيطالية لأكبر حقل غاز طبيعي في المياه المصرية، وبمناسبة فيضان البوستات من نوعية “وشك حلو علينا يا ريس”، ياريت نداري على شمعتنا لغاية ما الحمل يثبت، وياريت كمان مانوزعش المغات قبل ما المولود يشرف!!”.
وأضاف “الحذر واجب، جايز الحمل يكون كاذب زي حمل ملك الجمل في مسلسل القاهرة والناس (ده مسلسل تليفزيونى قديم من الستينيات معظمكم مش عارفه.. مش مهم).. مهم ناخد بالنا إن بيانات شركات البيزنس مش دايمًا بتكون لوجه الحق والحقيقة.. وماحدش عارف إيه اللي بيحصل في الكواليس!”.
وأشار “حسني” إلى أنه في كثير من الأحيان يكون الإعلان عن مثل هذه الأمور سببه الرئيسي دعم أسعار أسهم الشركات في البورصة، أو دعم موقفها التفاوضي مع بلدان أخرى”.
وتابع: “خليكوا فاكرين الله يعمر بيتكم إن إعلان شركة أرابتك عن بناء مليون وحدة سكنية كان هدفه من ناحية دعم السيسي في الانتخابات، ومن ناحية تانية دعم أرابتك في البورصة، ودعم رئيسها في اجتماعات مجلس الإدارة، وكلنا عارفين إنه لا المليون وحدة اتبنوا، ولا رئيس أرابتك نجح فى إنه يخدع مجلس الإدارة فى بلده!”.
واستطرد: “ده ما يمنعش إننا نتفاءل لو حبينا، ولا إننا نحمد ربنا في كل الأحوال، ولا إننا ندعي من قلبنا إن ربنا يجعله خير.. بس سايق عليكم النبي بلاش ضحكة مظهر أبو النجا دي أحسن شكلنا بقى وحش قوي!!”.
.png)
