أكد المهندس طارق قابيل، وزير التجارة والصناعة، أن النمو الاقتصادي في مصر أفضل من الدول الأوروبية المتقدمة، قائلًا “إحنا أفضل من أميركا في النمو الاقتصادي؛ حيث يصل حجم نمونا الاقتصادي إلى 4.2% بينما يصل حجم النمو في أمريكا والدول المتقدمة إلى 1.5%”.

وأرجع “قابيل”، خلال حواره مع مقدم البرامج محمد مصطفى شردي ببرنامج “يوم بيوم” الذي يعرض على فضائية “النهار” اليوم، حالة الاضطرابات في الحالة الاقتصادية لمصر إلى حالة الاقتصاد العالمي والاضطرابات السياسية في الدول المحيطة بمصر، قائلًا: “الدول المحيطة بمصر كانت تمثل 13% من حجم التصدير، وخسرنا أسواقًا كاملة.

وأشار إلى أن مصر تسعى لتحقيق 6% نسبة نمو اقتصادي بحلول 2018، و7% عام 2020، معربًا عن عدم رضاه عن حال الصناعة في مصر، قائلًا: “مش راضي عن الصناعة في مصر”، لافتًا إلى أن الوزارة بصدد إصدار تشريعات جديدة خلال الفترة المقبلة للمساهمة في نمو الصناعة المصرية.

وقوبلت تلك التصريحات بالغضب والسخرية من رواد مواقع التواصل؛ حيث كان من بين التعليقات ما يلي:

-marwa: “أقسم بالله انا حاسة ان الناس دى عايشة فى حتة والشعب كله عايش فى حتة تانية خالص، كل واحد قاعد فى كومبوند وحسابات فى بنوك وسرقة ونهب وفاكرين الناس كلها عايشة زيهم الله يخرب بيوتكوا …..”.

-abdallah: “ايوه طبعا وخلي الحسود يتكلم.. والتعليم عندنا احسن من فرنسا وعندنا طرق مستوية زي اللي في اوروبا بالظبط وداخلية بتحترم الشعب، مفيش سرقة ، مفيش نهب ، مفيش ظلم ، مفيش فساد….”.

– جلال: “التصريح الوزير نكتة القرن 21، التصريح يدخل التاريخ، وزير الأسطورة أنا معرفشي اضحك أو ابكي على التصريح ده”.

-عصام: “ياراجل متعرضهاش ده الناتج بتاع شركة فيس بوك اكتر من الناتج بتاعك، بيجبوكم منين ويمسكوكم وزرا! دي امريكا مفيهاش خمس وزرات علي بعض مش خمسين زينا وكله تمام”.

– younis: “والله العظيم يا جماعة الوزير ده مستحيل يكون صاحي، خلوه يجي دمياط ويشوف بعينه الورش اللي بتصنع الموبليا اللي قفلت والصنيعيه اللي راحوا اشتغلوا قهوجيه وبياعين خضار وفاكهة….”.

– mahmoud: “ايوة فعلا صح بالامارة الدولار بقي سعره فوق من كتر ما اقتصادنا قوي وعندنا نمو اقتصادي”.

-ezzat: “والله لو في شتيمة تتناسب مع السفالة والكذب الصريح ده كنت شتمت بس ده عدى كل الحدود ، بس هو يقصد امريكا البلد ولا امريكا المحطة!”.

-shady: “الوزارة دي حاطه خطة انها تشل الشعب بتصريحاتها، هي الناس دي من البلد دي ولا تايهين، ولا مين اللي مرشحهم لمقاعد وزارية أصلا، كده كتير والله كتير جدا”.

– tamer: “يا ….. يا كذابين يا منافقين وديتوا البلد في داهيه الدولار تجاوز ال٩ جنيه ولسه بتطبلوا….”.

– خيمر: “بيتكلم علي مصر ولا علي نمو إيه، والله اظاهر كده مش عارفين يعملو حاجة، بس يا حج كامل  كتكوت ابو الليل هيقوم بالمهمه وريح بالك خالص”.

– fadyaa: “لو سمحت بطلو شغل البانجو اللي بتضربوه بقي فوقو شويه حتغرقونا ارحمونا ربنا يرحمكم”.