يعاني أهالي وسائقي الفيوم، من الظلام التام لمسافة تزيد عن 20 كيلو متر من مدخل المحافظة بمنطقه مصانع كوم أوشيم، حتى قرابة مدخل مدينة الفيوم الرئيسي، منذ أكثر من عام.
وتعد محافظة الفيوم واحدة من المحافظات السياحية المصرية، وهي تربط القاهرة بالعديد من محافظات الوجه القبلي وطريقها الممتد بين القاهرة والفيوم، هو حلقة الوصل بينهما .
يقول علي سعيد، سائق سيارة أجرة، “أنا عمري ما شوفت طريق رئيسي لمحافظه بالمنظر دا، تحس انك ماشي علي طريق مقابر مش طريق المفروض إنه طريق لمحافظه سياحية، ييجي المغرب وبداية الليل ومعالم الطريق بتتغير تماما، والمشكلة دي مش جديدة، من أكتر من سنة واحنا على الحال ده”.
وأضاف، محمد السيد، سائق، “دا كمان بجانب إن الطريق فيه حفر لشركة الكهربا علي جوانب الطريق، ومع الضلمه كتير من العربيات عملت حوادث وخاصة السواقين اللي مش عارفين الطريق كويس، أو اللي اول مرة يمشوا عليه، والمسؤلين لاحياة لمن تنادي مش شاغلهم الموضوع”.
وأفاد يوسف سليمان، أحد سكان القرى المجاورة للطريق، “موضوع ضلمة الطريق دي، مسببه لنا مشكلة كبيرة، احنا هنا بنعتمد علي تربية المواشي والعجول، وبنضطر طول الليل نفضل سهرانين عشان نحرس مزارعنا لأن ضلمة الطريق بتخلي البلطجية والحراميه يسرقوا، وكتير من المزارع اتسرقت بليل من غير ما حد يدري” .
