مع اقتراب إعلان نتيجة تنسيق المرحلة الأولى للثانوية العامة، قدم نشطاء مواقع التواصل الاجتماعي العديد من النصائح للطلاب المقدمين على المرحلة الجامعية، مشددين على ضرورة الالتحاق بما يرغبه الطالب وليس ما يرغب أهله أو مكتب التنسيق.

وقال الإعلامي عبد الله الماحي، في تدوينة له عبر حسابه بموقع “فيس بوك”: “يا طلاب الثانوية العامة والأزهرية لسنا بحاجة لدكاترة ولا لصيادلة ولا لممرضات ولا لمهندسين موجود منهم كتير في بلدنا والبلد مليانة منهم والحمد لله وكل شوية بنعطر فيهم والله وهما على راسنا طبعاً في كل الأحوال”.

وأضاف الماحي: “أمتكم تحتاج إلى قادة وسياسين وقضاة وقانونين ومترجمين محترفين وإعلاميين صادقيين”.

واستطرد في نصيحته قائلا: “أنصحكم يا شباب بالالتحاق بكليات الاقتصاد وعلوم سياسية
الحقوق والشريعة والقانون والإعلام واللغات والترجمة والألسن ولن تندموا في حياتكم العملية”.

وكتب أحمد عبد العزيز لطلاب الثانوية العامة قائلا: “لو انت أدبي ومجموعك مش جايب كلية تشغلك بعدين أو لو انت علمي وماجبتش مجموع طب وهندسة خد مني النصيحة الصغيرة دي.. فيه كلية اسمها آداب فيها قسم جغرافيا جواه شعبة مساحة أو مساحة وخرائط”.

وتابع: “دا قسم كويس ومستقبله مش بطال هتتطلع منه فني مساحة هتشتغل مع مهندسين وله سفر كويس في الخليج”.

واستطرد قائلا: “دي نصيحة للطلاب اللي فاتهم كليات القمة وعايزين حاجة لها شغل بعدين هيحتاج منك بس شوية كمبيوتر ويا سلام لو طورت نفسك مع اتوكاد وGPS ودورة توتال ستيشن (دا جهاز رفع مساحي هتعرفه لما تدخل القسم)”.

وختم نصيحته قائلا: “ملحوظتان أخيرتان.. اتاكد ان كلية الآداب اللي انت داخلها فيها في قسم الجغرافيا شعبة مساحة.. ولو مجموعك مجابش كلية الآداب هتلاقي معهد مساحة ممكن تقدم فيه وهيقضى الغرض.. المهم انك تخلع من المخروبة دي”.

أما عمرو جمال، فقال: “نصيحة لطلاب الثانوية العامة متكملش تعليمك في مصر الحياة اقصر من انك تحاول في منظومة فشلة ولم تستفد أي حاجة وشها زي ضهرها من الآخر تفاؤل”.

وقدم Nasser Hegazy نصيحتين لطلاب الثانوية العامة، حيث قال: “أول نصيحة لطلاب الثانوية العامة ادرس اللي بتحبه مش اللي مجموعك يجيبه”.

وأضاف: “تاني نصيحة لطلاب الثانوية العامة الكلية مش نهاية المطاف تميزك في سوق العمل هيبقى بالعلم اللي عندك زيادة عن باقي دفعتك زي كورسات ودورات ولغة”.

وأضاف Ali Yousre إلى هذه النصائح قائلا: “نصيحة لطلاب الثانوية العامة متدخلش الكلية اللي أبوك أو أمك أو خالتك “عواطف” عاوزينك تدخلها.. خليك ملك قرارك في مواجهة الجميع”.

وقال ساخرا: “الحياة يا بني مش عبارة عن مجموع حضرتك جبته نتيجة تسريب الامتحانات ع النت، أو مطوة اترفعت في وش مراقب في لحظة شيطانية، أو برشام فضلت سهران عليه لغاية ما عنيك دمعت، الحياة أكبر من كدا.. أحلى من كدا.. أحقر من صاحبك اللي فضل يعايرك بالـ5.% الزيادة اللي جبهم عنك، لذلك لا تتردد أنك متخشش أي كلية من أصله، أنت حققت هدفك المنشود من الدنيا أنك جبت مجموع عالي، اتجه إلى الإختراعات زي طلاب المنوفية الأبرار، اللي عمرنا ما سمعنا غير عن صوتهم وهما بيعلنوا كل يوم تلات من أول شهر عن اختراع بيدمر نظريات (اينشتين واسحق نيوتن وماكس بلانك وعب العزيز الفيشاوي.. إلخ.

ورفض Hazem Saad Hassaballah إقبال الطلاب أصحاب المجاميع العالية على كلية الطب، وقال: “نصيحة لطلاب الثانوية العامة اللى نفسهم يخشو طب.. خش طب بس طب اسنان بتدرس خمس سنين وبعد كده بتفتح عيادة وبتجيلك فلوس زى الرز.. لو دخلت طب عادى بتدرس سبع سنين وبعد كده سنتين تكليف وبعد كده بتتمرمط بتاع خمس سنين ف مستشفيات الحكومة وبتقبض ملاليم.. اعمل الصح وخش طب اسنان لو نفسك في الطب”.