يشكو أهالي قرية الوسطاني، إحدى أكبر قرى مركز كفر سعد بدمياط، وتوابعها، من حرمانها من الكثير من الخدمات وأولها الاهتمام بالنظافة.
يقول خالد محمد، من أبناء الوسطاني: “بلد كبير زي ده إزاي ما يبقاش فيها عدد كافي من سيارات القمامة في الوحدة ولوادر وعمال، علشان يقدروا يرفعوا كل القمامة دي، الناس في البلد كل بيت صغير أو كبير في وسط البلد أو في أطرافها، الكل بيدفع رسوم النظافة، يعني حقك وبتاخده، ليه بقى مش بتديني حقي في نظافة المكان”.
وأضاف “وهو كل ما نشتكي يقولوا مفيش إمكانيات، طيب فلوسنا بتروح فين، ولما مفيش إمكانيات إنك تنظف بتاخد مننا فلوس للنظافة ليه، وبتدفعنا رسوم، إحنا تعبنا من الشكاوى.. مش دافعين نظافة ولا جنيه، وندفع ليه لما إحنا عايشين في وسط أكوام الزبالة فة كل مكان”.
وعلق محمود صابر: “البلد بتكبر وبتوسع وعدد سكانها بيزيد ومع ذلك الوحده المحلية محلك سر مفيش أي تقدم لمواكبة الزيادة في أعداد السكان ولا متطلباتهم، أكوام القمامة منتشرة في البلد في كل مكان وبتفضل يمكن أسابيع علشان تترفع، وطبعًا ده بيخليها تتخمر ويطلع منها رائحة كريهة جدًا ويتربى جواها الحشرات والميكروبات اللي بتجيب الأمراض”.
وأضاف “وكمان القوارض والفئران اللي هتطفشنا من بيوتنا، بسبب أكوام الزبالة، وفي الآخر محدش بيسأل ويمكن الناس تضطر تتكاتف وتجيب عربيات كارو وتشيل عليها الزبالة بنفسها، يبقى بندفع رسوم نظافة كل شهر واللي ما يدفع يتعمل له قضية وياخد حكم غيابي وممكن يتحبس وبرده احنا اللي بنشيل الزبالة بنفسنا وعلى حسابنا، يبقى مش عارفين ليه بيحصلو مننا رسوم نظافة يرحمونا بقى منها لو مش قادرين يشيلوا الزبالة”.
