شهدت محافظة الإسكندرية في الآونة الأخيرة ارتفاعًا ملحوظًا في أسعار اللحوم بمختلف أنواعها؛ والتي وصلت إلى 186 جنيهاً للكيلو، وقد أدى ذلك للجوء البعض لتنظيم حملة لمقاطعة شراء اللحوم في المحافظة لحين عودة أسعارها.
ووصلت أسعار اللحوم في منافذ البيع الكبيرة إلى 168 جنيها للكيلو لحم البتلو، و182 حنيها للبفتيك، و106 جنيهات للشمبري، و108 جنيهات للريش الشمبري، و110 جنيهات للإنتركوت، وأخيرا 186 جنيها لكيلو الكبدة البتلو.
وكانت لشبكة “رصد” جولة بين الأهالي لسماع آرائهم حول الأزمة، فقال عثمان حمدان، أحد الأهالي: “بص يا بيه اللي معاه فلوس هيشتري واللي مامعهوش مش هيشتري والحاجة بتغلى، والناس مش لاقية وماحدش واخد باله من الغلابة، كله بيدور على نفسه”، بينما أضاف محمد رمضان، موظف: “أسعار اللحوم بقت غالية بطريقة مستفزة، وأنا واحد من الناس ماقدرش أشتري لحمة على طول، وأغلب اعتمادي بيكون فراخ أو سمك علشان أرخص”.
كما شاركت مريم رضا، ربة منزل، مؤكدة مشاركتها في حملة مقاطعة اللحمة؛ قائلة: “الأسعار كلها غالية مش اللحوم فقط أنا مشاركة في مقاطعة اللحمة، والمفروض تعملوا حملة أحسن لمقاطعة كل حاجة في البلد لحد الأسعار ما تنزل علشان كده حرام، ومش عارفين نعيش، يعني هنلاقيها من الأكل والشرب ولا مصاريف العيال والمدارس ولا من العلاج ولا إيه ولا إيه”.
وفي السياق نفسه، قال سيد أبو دومة، أحد تجار اللحوم: “أنا عارف إن أغلب التجار بيرفعوا الأسعار في أي وقت ومن غير أي أسباب، ولكن فيه أوقات بنضطر فيها إلى رفع الأسعار بسبب زيادة أسعار الأعلاف، وهلاك العديد من المواشي، سواء بسبب ارتفاع درجات الحرارة الزائدة هذه الأيام، أو لانتشار بعض الأمراض التي تسبب موتها أحيانا أخرى، كانتشار الحمى القلاعية وغيرها من الأمراض”.
