تعرضت قرى مركز فارسكور والزرقا بدمياط لموجة من الطقس السيئ أمس الأربعاء، صاحبه تساقط أمطار غزيرة حولت قرية دقهلة بمركز الزرقا لصورة مصغرة لما حدث في الإسكندرية، حيث غمرت المياه الشوارع ودخلت البيوت على سكانها وعطلت حركة المرور في الشوارع ما ترتب عليه تعطيل مصالح المواطنين.
وفي جولة لشبكة “رصد”، يقول عطية محمد من سكان القرية: “تعرضت القرية لموجة كبيرة جدا من الأمطار وكأننا سيول مش أمطار، الشوارع غرقت في المياه، ومياه الأمطار دخلت البيوت على الناس وبلاعات الصرف الصحي مليانة على آخرها ومش مستوعبة أي مياه زيادة، وكمان البلد مفيش فيها صرف أمطار والشوارع تراب وتحول لطين وبحور مياه، حتى السيارات توقفت تماما وعجزت عن المشي، وللأسف مافيش حد سأل فينا ولا أي مسؤول وصل للقرية يشوف الناس عايشة إزاي أو المياه دي هتتصرف إزاي”.
وأشار عمرو باسم، طالب: “الشوارع غرقت والبيوت غرقت وكمان الكهربا والمياه قاطعين من بعد الدنيا ما بطلت المطر، وفضلت أكتر من خمس ساعات والقرية دون مياه و كهربا، طيب نعيش إزاي؟ والشوارع محتاجة قوارب علشان نمشي بها ونتحرك، والبيوت بقت زي الشوارع، وأجهزة كتير تلفت والأثاث المنزلي غرق في المياه ودي ناس غلابة ومش عارفين يعملوا إيه في الكارثة اللي حلت عليهم دي”.
وأضاف: “لما حصل فينا كده وإحنا لسه في بداية موسم الشتاء يبقى إيه اللي هيحصل لما ندخل في الجد؟ والوحدة المحلية ولجان متابعة الكوارث اللي قال عليها المحافظ يبدو إنها كلام على ورق ولا شوفنا حد منهم”.
