قالت نبيلة مكرم، وزيرة الهجرة وشؤون المصريين في الخارج، “أمكم مصر بتقولكم ارجعوا عشان هي محتاجة مساعدتكم وبناء الدولة بسواعد الأبناء”.

وأوضحت -خلال زيارتها لمحافظة المنيا، في إطار الحملة التي تتبناها الوزارة لشرح مخاطر هجرة الأطفال للخارج بطريقة غير شرعية- أن الوزارة تسعى لجلب العقول المهاجرة في الخارج لبناء مصر.

وتداول المغردون تصريح وزيرة الهجرة، بشيء من السخرية والاستنكار لذلك الطلب، مشيرين إلى أن الوضع بمصر لا يصلح بأي حال من الأحوال لهم، طالبين من الحكومة أن تنظر للشباب العاطل بالداخل أولًا وتعمل على حل مشكلاتهم.

جاءت التعليقات:

– مجدي مناع: “والله الواحد مش عارف يضحك ولا يعيط، أنا من جوه مصر بقول لكل واحد بره مصر اوعى تيجي”.

– Nasser Nasser: “نرجع فين يا…… ده حلم كل شاب دلوقتي إنه يسيبها ويطفش… وأكبر عقوبة بقت المنع من السفر… الله يحرقكم جبتوا ضلفها”.

– Ahmed Abdalrady: “يرجعوا عشان يقعدوا على قهاوي؟ وليه لا يا اللي في الخارج خليك وياريت تبعتلنا”.

– Mohamed Mohamed: “أنا سمعت الكلام واشتريت شقة في كمبوند المهندسين براديس بالقاهرة الجديدة تبع نقابة المهندسين ولكن الحكومة سحبت الأرض من النقابة وفلوس 300 أسرة سمعوا نداء مصر ضاعت”.

– Mohsen Abdelwhab: “عايزة الشباب اللي سافر يرجع عشان مصر محتاجاهم؟ والبلد هاتوفر عملة صعبة ازاي؟؟ من تحويلات هؤلاء بعد ما السياحة انضربت……. شوفي شغلك يا ولية ووفري شغل للشباب العاطل… دوري لهم على عقودات ببلاش بدل مابيبيعوا ممتلكاتهم علشان شراء عقد.. دوري على قانون لهم ميدفعوش ضريبة أمن عام.. دوري على قانون يلغي التصريح الأمن الوطني على بعض الدول، زي كوريا تركيا ماليزيا الأردن لبنان السودان…. دوري على قانون اللي يموت فيهم بغربته يرجع على نفقة الدولة”.

– زكريا السيد: “ياريت المسؤول المصري يفكر جيدًا قبل أن يهذي بكلمات تقلل من شأنه وتجعله أضحوكة للكافة…. كنت أتمنى من صاحبة هذا التصريح الغث أن تهتم بالشباب داخل الوطن وخاصة حاملي الدكتوراه والماجستير الذين يتظاهرون من أجل فرصة عمل”.

– Malk Abueldahab: “هيرجعوا يعملوا إيه؟ عندك ميزانية للبحث العلمي مخصصة للعقول المهاجرة؟ ولا هيرجعوا يقشروا بصل؟، عالعموم سيبك من اللي بره.. عندك داخل مصر شباب مبتكر الحقوهم قبل ما يهاجروا أو ينتحروا أو تسرقهم الإمارات”.