أعلن الفنان الشاب هادي خفاجة، اعتزاله الفن في مصر بشكل نهائي؛ بسبب الفنان محمد سعد؛ حيث قام بالاستعانة به للمشاركة في برنامج “وش السعد” ثم تجاهله.
وقال الفنان هادي خفاجة، عبر صفحته الخاصة بموقع التواصل الاجتماعي “فيس بوك“: “قررت أنا هادي خفاجة اعتزال التمثيل نهائيًا في مصر، وده بسبب الموقف اللي أنا هاحكيه، موقف في قمة قلة الذوق اللي في الدنيا”.
وأضاف “جاتلي مكالمة الساعة 12 بالليل إن محمد سعد عايزني في تصوير حلقة من برنامج “وش السعد”، وأنه عايز يقعد معايا، طبعًا لبست وروحتله الساعة 1 كان موجود الكاست كله ونجوم الحلقة أيتن عامر ومنة عرفة، وعملنا بروفة واتفقت مع مدير الإنتاج والملابس وكل حاجة وأستاذ سامح عبدالعزيز المخرج قعدت معاه واتكلمنا عن الشخصية”.
وتابع: “اتفقنا أن التصوير بعدها بيوم خلصت كانت الساعة 4 الفجر، روحت البيت نمت وصحيت، استعديت نفسيًا إني رايح التصوير وحفظت السيناريو، وكان الميعاد الساعة 5 المغرب.. بعدها لقيت اتصال وأنا في الطريق الساعة 4 العصر من واحد من مساعدين الإخراج بيقولي أستاذ هادي إحنا أجلنا الاسكتش بتاع حلقة حضرتك وهنكلمك نقولك إمتى التصوير إن شاء الله”.
ويكمل خفاجة: “بفتح “MBC مصر“، لقيت الاسكتش بتاعي اتصور بممثل تاني! طب ليه اللف والدوران؟.. الحمد لله تاريخي مش هيقف على حلقة، بس موضوع تقدير، أنا حبيت أحكي لأني وسط حاجات كتير حصلتلي مكنتش مستحمل حركة زي دي، وبكرة بإذن الله هاكون في نقابة المهن التمثيلية وهسلم أستاذ أشرف زكي عضوية النقابة؛ لأنها متلزمنيش في شيء دلوقتي، بس بجد كفاية تدمير في المواهب وإحباط في الناس لأن الوسط بجد أصبح عصابات تتحكم فيه”.
وختم خفاجة: “إن شاء الله هكمل مستقبلي الفني في دولة تانية بتقدر الإنسانية قبل المواهب والمجالات وده قرار نهائي بجد بيني وبين نفسي مش هرجع فيه”.
