نشرت قناة «مكملين» تسريبًا صوتيًا لضابط مخابرات يُدعى أشرف الخولي مع الممثلة المصرية يسرا بشأن إعلان القدس عاصمة «إسرائيل».

وكان الرئيس الأميركي دونالد ترامب، قد أعلن في 6 ديسمبر الماضي، القدس عاصمة «إسرائيل»، ووصفت دول عديدة قرار ترمب بأنه انحياز فاضح للاحتلال الإسرائيلي.

وقال «الخولي» لـ«يسرا»: «بكلمك عشان لو أي حد سأل حضرتك في تصريح عن إعلان ترامب القدس عاصمة إسرائيل ميكونش مخالف عن توجهنا».

وأضاف: «إحنا هنستنكر زي ما الجميع بيستنكر موضوع إن القدس تكون عاصمة لإسرائيل»، مضيفًا: «إحنا بنستنكر؛ إنما في الأصل الأمر ده سيصبح أمر واقع مش هنقدر نعمل قدامه أي حاجة»

وردت «يسرا» بأنها تعرف كل هذا الكلام، وتابعت: «بس محدش هيسألني وهرفض إني أنا أتكلم فيها وهقول إن إحنا بنستنكر ده».

وبالأمس، كشفت صحيفة «نيويورك تايمز» الأميركية، عن تسريبات تتحدث عن قبول عبدالفتاح السيسي برام الله عاصمة لفلسطين بدل القدس.

وجاءت المكالمة ونصها كالتالي:

يسرا: أهلا وسهلاً يا فندم

النقيب أشرف: أهلاً بحضرتك، بقول لحضرتك: إحنااااا كنا عاملين مداخلات للإعلاميين بخصوص الللللـ موضوع

يسرا: أنا دلوقتي في دبي وأنا دلوقتي.. أستاذ أشرف أنا دلوقتي في دبي، ومش هينفع أسمعك؛ لأني هاكون على الهوا؛ فمش هينفع أسمع كلمة ولا أقدر أتكلم؛ لأني «أون آير» دلوقتي في دبي في المهرجان

النقيب أشرف: مهرجان فني يعني

يسرا: ممكن نعمل.. أيوة أيوة

النقيب أشرف: يعني مش هيبقى في كلام عن موضوع القدس، موضوع القدس عاصمة «إسرائيل»، يعني مش هيبقى في كلام بخصوص الموضوع ده نهائي؟

يسرا: القرار متاخد كدا كده ولّا متأجل القرار فيها زي ما بيتقال؟!

النقيب أشرف: لأ، هو الموضوع إن الللـ ترامب أعلن فعلًا رسميًا الموضوع يعني، فأنا كنت عايز أقولك بس خطوط عريضة توجه الدولة المصرية فيها…. بحيث حضرتك

يسرا: أنا أنا مش عارفة أسمعك كويس، يعني يا ريت تكلمني بكرة بالنهار أبقى شاكرة أفضالك؛ علشان نتكلم براحتنا ونشوف.

النقيب أشرف: طيب بصي بس يا فندم، عشان أنتي لو أي حد سأل حضرتك في تصريح ميكونش مخالف عن توجهنا

يسرا: لأ طبعًا

النقيب أشرف: فأنا أنا بس

يسرا: التوجه بتاعنا إحنا

النقيب أشرف: الله ينور عليكي، التوجه بتاعنا هو إحنا هنستنكر زي ما الجميع بيستنكر موضوع إن القدس تكون عاصمة لإسرائيل، تمام؟

يسرا: ما إحنا كلنا مستنكرين

النقيب أشرف: لكن، لكن، ده المهم اللي جاي بقى، إحنا بنستنكر إنما في الـ في الأصل الأمر ده سيصبح أمر واقع مش هنقدر نعمل قدامه أي حاجة

يسرا: أنا فاهمة

النقيب أشرف: لذلك إحنا القضية الأساسية.. القضية الأساسية هي إنهاء معاناة الشعب الفلسطيني بشكل كامل، وده اللي كان متفق عليه هو اللي بيتم الآن

يسرا: من فضلك تقولي تاني… بص بص، أنا مش هينفع أسمعك دلوقتي، بس محدش هيسألني، وهرفض إني أنا أتكلم فيها، وهقول إن إحنا بنستنكر ده؛ واديني فرصة إنك تتصل بيا “بلييييز” بكرة، واعمل حساب فارق التوقيت هنا ساعتين بعديكو.

النقيب أشرف: تمام تمام

يسرا: ألوووووو

النقيب أشرف: ماشي يا فنانة حاضر حاضر

يسرا: وقولي كل التفاصيل عايز تبعتلي على “الواتس آب” ابعتلي

النقيب أشرف: لا لا إحنا بنفضل الـ الـ الكلام المباشر أفضل

يسرا: طب شكرًا.. ميرسي

النقيب أشرف: تمام يا فنانة بالتوفيق مع السلامة

يسرا: أوكي