بعد عودة التوقيت الصيفي..نشطاء : ده قمة الإعجاز الحكومي لحل مشكلة الكهرباء

عودة  العمل بالتوقيت الصيفى القرار الذي اتخذه رئيس الوزراء الإنقلابي ابراهيم محلب ، وتطبيقه بدءا من الخميس الموافق 15 مايو الجارى، وإيقافه خلال شهر رمضان، ثم عودته بعد انتهاء شهر رمضان من جديد، وذلك بعد أن كان تم إلغاء العمل به فى أعقاب ثورة 25 يناير، أحدث ردرود أفعال متفاوته من السخرية، على مواقع التواصل الاجتماعى “تويتر”، “فيس بوك”

علقت ريهام فتحى بقولها ” الحاجة الواحدة الباقية من ٢٥ يناير أهى راحت”، وكتب محمد خالد ” قرار جيد هيقضى على البطالة وهيحقق الأمان وهيرفع الاقتصاد حكومة زى الفل”.

 وقال الناشط على عيد أن، ” التوقيت الصيفى آخر إنجازات ثورة 25 يناير

وغرد محمد صلاح عبر “تويتر” قائلاً ” انتبه من فضلك السيارة ترجع إلى الخلف”، وكتب محمد صبحى ” الفراغ وحش مفيش أى مشاكل فى البلد عايزة حلول ماعدا التوقيت الصيفى عاملنا أزمة”.

وكتب جلال راشد، ” يا ثورة ما تمت ليه كده نهيتوا على آخر حاجة حققتها ثورة يناير”.

وقال «زياد»: «التوقيت الصيفي رجع وحق الشهدا لسه مرجعش، عظيمة يا مصر»، بينما سخر عمرو عبدالهادي، متحدث جبهة الضمير، من القرار، قائلًا: «طيب يرجعوا حسني مبارك بقى».

وفيما أوضح سيرجيو المصري: قائلًا: «حتى التوقيت الصيفي رجع تاني، وكأن ثورة لم تقم وكأن نظاما لم يسقط».

وطالب محمد السيد بعدم قطع التيار الكهربائي، مضيفا: «يعني هترجعوا التوقيت الصيفي شهر وتلغوه في رمضان علشان الصيام، طب ياعم سيبوا بس متقطعش النور الله يباركلك».

محمد الشواف قال :" بناخد التوقيت الصيفى ونخليه يعدى من رمضان ونستناه من الناحية التانية ونطبقه تانى ودا قمة الإعجاز الكهربى.

أحمد محمود:" وده كان آخر حاجة اتأخونت في البلد ولازم ترجع على طبيعتها ".

سيف محمود: "هوه احنا مش هنخلص من فيلم التوقيت الصيفى ده ".

داليا كريم:" متضايقة قوى من رجوع التوقيت الصيفى، عمرى ما ارتحت وهو شغال كنت باحس نفسى متكربجة ".

محمد عيد:" وبكدااا نكون حلينا كل مشاكلنا بعودة التوقيت الصيفى وبكدااا حلينا مشكلة الكهرباء والحياة هتبقى زبادى خلاط وهو دااا قمة الإعجاز الحكومى  ".

أسماء فؤاد:" أهلًا باللخبطة.. آه يا ساعتى البيولوجية يانى ".

نشوى مصطفى:" تحس موضوع التوقيت الصيفى ده زى طقم الملامين بتاع جارتنا المهبوشة أول ماتتعصب تروح هبداه في الأرض لاهو بيكسر ولاهى بتفش غلها ".

كريم محمد:" حكومة ‏محلب  هاترجع التوقيت الصيفى، كده دى أول خطوة على إعادة مشكلة الكهرباء لما كانت عليه في 2011، الخطوة التانية لازم تكون القضاء على الكهرباء المسروقة، وأعتقد بعد الخطوة التانية هاتكون مشكلة الكهرباء اتحلت بنسبة 50% تقريبا أتمنى ".

أحمد وجيه:" خلاص الحكومة حلت كل المشاكل ومش لاقيين حاجة يعملوها غير إنهم يرجعوا التوقيت الصيفى  أصحاب العقول ف راحة".

عزت بيومى:" ترجيع التوقيت الصيفى علشان مافيش حاجة تفكر الناس بثورة يناير ".

ميدو توتى:" بصوا أنتوا ترجعوا حسنى مبارك أوك أما إلا رجوع التوقيت الصيفى من تانى ده المكسب الوحيد إلى أخدناه ".

أمل سعيد:" التوقيت الصيفى هايرجع.. ومش عايزين بقى حد يقول المكسب الوحيد للثورة، الثورة ماقمتش عشان نقدم ساعة ولا نأخرها